富國島飲品·甜品篇 - pix soul

富國島飲品‧甜品篇

撰文: So    📅2019-08-14    Pixsoul 隊員: Jowy & So

富國島全年都維持係22-30度,十分炎熱,所以當地人每逢出街都鍾意買杯野飲消下暑,而我地就鍾意食下雪糕降下溫,仲有小糕點推介:

1)Nước mía 蔗汁

每次經過賣白甘蔗汁既小攤檔都會買一杯,因為實在太消暑解喝啦!! 一杯新鮮榨既白甘蔗汁只港幣幾蚊,好抵呀~有d攤檔仲會加入桔仔,係Jowy既至愛飲品。


2)Nước dừa 椰子汁

聞說越南盛產椰子,椰汁係當地人常飲既飲料。我地係富國島試既椰子汁都係酸既,冇香港既甜味。不過Sophia依然愛係海邊拎著青皮椰子chill,係影相一流既道具。


3)Cà phê 咖啡

越南屬於濕熱既熱帶氣候,適合種Robusta咖啡豆,佢既咖啡因含量大概比Arabica多2倍。由於咖啡因本身略帶微苦,所以富國島既咖啡一般都較為苦澀。越南咖啡既特式就係佢會用甜味較重既煉奶沖調,中和苦澀味。


4)Sinh tố 果汁沙冰

係富國島會見到好多果汁小攤檔,唔少當地人都會去買沙冰嫁。小攤檔會用水果新鮮即榨,加入煉奶、冰、糖,啱曬鍾意甜既朋友。我地今次試左木瓜、士多啤梨、榴槤同刺果番荔枝。木瓜味都幾清新;而士多啤梨則比較甜。榴槤沙冰就唔係好重味,連唔食榴槤既朋友都接受得到。刺果番荔枝係香港未見過,味道好似番鬼荔枝,都幾好飲。


5)Bánh bò 越南蜂窩蛋糕

越南蜂窩蛋糕係用椰奶、米粉、酵母同棕櫚糖製成,富有當地特色既甜味。 蛋糕入面有好多小氣泡,似白糖糕,十分煙韌。


6)Kem 雪糕

富國島既超市都有少量雪糕賣,我地試左3款,冇中伏。 -芒果雪條:正常芒果味,質感有d似軟糖。 -脆皮芋頭雪條:朱古力花生脆皮加芋頭雪糕,唔會太甜,好味。 -不知名東東:其實係乳酪沙冰,益力多味,味道幾好;不過個樣有d驚嚇,好有溶完再雪既感覺。


更多PixsoulHK的文章......

富國島美食篇

富國島有咩手信?

富國島攻略

富國島輕鬆遊