富國島攻略 - pix soul

富國島攻略 Phu Quoc

富國島係越南西南邊對開既海域,約有五九十平方公里,係越南境內最大既島。
越南政府近年大力發展富國島既旅遊業,為佢打造成星級度假勝地,所以富國島有唔少良好配套既酒店同遊樂設施,大家亦可以盡情享受陽光與海灘。

富國島氣候

富國島全年維持係22-30度之間,氣候怡人,為度假好去處。不過要留意富國島既雨季同旱季分明,每年十一月至翌年四月既降雨量較少,較適合旅行。


富國島簽證

越南政府為左吸引多d遊客去富國島,所以實施左短期逗留免簽證優惠。如果持香港特區護照、係香港直飛富國島,唔停胡志明或河內等地方,就可獲三十日免簽證優惠啦。


香港去富國島航班

越捷航空 (Vietjet Air) 有直航來往香港同富國島,飛行時間約2小時45分,而家逢一、三、五、日有航班。

網址:www.vietjetair.com


富國島景點推介

越捷航空(直航)去程係香港晏晝出發,大概夜晚到富國島;而回程即係早上起飛;所以建議大家最少去4日3夜。我地今次就去左6日5夜,不過都係輕鬆玩沙灘同浮潛,冇去到主題樂園,所以我地會主力介紹沙灘~哈哈

1. Sao Beach 牛奶沙灘

地區:富國島既南面
特點:水清沙細、椰林樹影、雙人韆鞦
設施:收費停車場、收費沙灘椅加傘(VND150K/椅)、收費單人及雙人韆鞦(VND20K/人)、收費水上活動、收費區有廁所、淋浴設施、餐廳、飲品亭

Sao Beach位於富國島既南面,水清沙細、灘床寬闊且波平浪靜,係富國島最靚既海灘之一。Sao Beach仲有個花名叫牛奶沙灘,可能因為佢既沙呈乳白色,又幼細;大家可以赤腳係沙灘上行走,感受一下沙粒既柔軟。此外,海水既成份有別於其他海灘,游完水都唔會覺得黐納納,反而有浸完牛奶浴既感覺!!

Sao Beach亦有好多水上活動供大家選擇,如充氣水上樂園、香蕉船、獨木舟等。而小編就選擇左悠閒咁瞓係沙灘椅上,聽著海浪聲,享受日光浴。Sao Beac仲有椰樹、韆鞦,大家可以打卡照靚相。如果覺得肚餓,係泳灘就有餐廳啦,十分方便。

由於乾淨既Sao Beach有專人管理,所以全部設施都要收費。停車場既收費可抵換其他消費品嫁,小編就租左沙灘椅,可以好好睡下。

行遠d會見到一個冇人管理既位置,不過沙比較黑,地上有垃圾同蚊比較多,不太建議前往。

2. Starfish Beach 海星沙灘

地區:富國島既北面
特點:海星、長木橋
設施:免費停車場、收費沙灘椅加傘(VND50K/椅)、餐廳、飲品亭

Starfish Beach因滿地紅海星 (學名叫Protoreaster nodosus) 而出名,海星向上突出既黑尖係用黎嚇走掠食者,不過唔會造成真正既傷害。

Starfish Beach的設備比較原始,沒有更衣室,想落水影相既朋友記得著定泳衣啦~Starfish Beach既海水係泥黃色,夾雜住少少垃圾,所以小編當日都唔見有人游水;大家都係沿著沙洲行去尋覓海星咋。

另外,Starfish Beach有條長長既水上木橋,通往餐廳,配上大藍天係個唔錯既景色。

3. Long Beach 長灘 - Sunset Sanato Beach 日落海灘

地區:富國島既西南面,鄰近機場
特點:藝術作品
設施:免費停車場(要收入場費VND70K/人)、收費沙灘椅加傘(VND100K/椅)、酒吧、餐廳、廁所、户外淋浴設施

長灘真係十分長,沿著富國島的西南海岸延伸大約20公里,等於由大埔去到旺角咁遠。
長灘既北端係富國島大多數旅遊業既所在地:數十間酒店,度假村,餐廳,咖啡館同酒吧一路開向通往陽東鎮既道路。
據說長灘係十月到四月都係波平如鏡,不過小編5月去既果幾日就好大風大浪,不能游水。

長灘最獨特的部分位於Sunset Sanato Beach Club酒店,簡稱日落海灘,擁有超乎想像既藝術作品,亦係每年元旦舉行海洋音樂節Phu Quoc - Epizode既地點。

「大海上的流浪大象」應該受藝術家達利作品「太空象」啟發而成。我地現實認知中既大象係十分笨重,但卻配上了細長既腳,輕盈漫步。呢種衝突、矛盾既元素相互結合,真係超乎現實,令人不禁駐足欣賞。

4.富國島跳島浮潛

我地最推薦富國島既活動就係跳島浮潛,因為外島較少污染、水比較清,可以見到唔少色彩豐富既珊瑚、仲可以同魚黎個親密的接觸。今次參加左【富國島:3島全日浮潛之旅】,真係超級抵!!

只需港幣$256,就可以由朝早9點玩到晏晝5點、去3個小島、包南部酒店接駁同埋午餐,仲要冇強迫性購物點,真係物超所值。

詳情可以睇:富國島浮潛、跳島一日遊


富國島交通

富國島暫時冇完善既公共交通網絡,亦沒 Uber 或者 Grab。大家可以參加當地/ PixsoulHK tour、搭的士、電車單、包車或自駕。

我地今次係自駕,富國島主要既道路都係平坦石屎路,小街小巷會有爛路、泥路;而去Starfish Beach既路亦會比較崎嶇。 係富國島租車既手續相當兒戲,只係相約於機場檢查下車、影底護照、俾現金,咁就交收完成啦~連收據都冇張,保險就更加冇啦。大家想租既話就自行評估風險啦


富國島美食

富國島地方雖小,不過都有齊越南既美食,而且好味又抵,想知富國島有咩好野食?快d睇下【富國島美食篇】


富國島有咩手信?

富國島特產有花生﹑咖啡﹑胡椒粒﹑珍珠。我地都係鍾意買食既~試食點評即將推出!!


富國島酒店推介

-The Shells Resort & Spa Phu Quoc點我查看Booking.com房間

-Premier Village Phu Quoc Resort:點我查看Booking.com房間


更多PixsoulHK的文章......

富國島浮潛、跳島一日遊

富國島美食篇

富國島工展會?!

富國島輕鬆遊