據說富國島特產有花生﹑咖啡﹑胡椒粒﹑珍珠等，Pixsoul成員都係鍾意買食既多d～睇下我地既試食點評啦!!
１）花生
我地今次試左椰子、檸檬雞同龍蝦味花生，據說龍蝦味暫時得越南有嫁咋。佢地既質感同魚皮花生差唔多；椰子味花生真係有淡淡既棷子甜味；而檸檬雞就係咸咸地，食唔出檸檬味，有d似公仔麵味粉，都唔錯。最特別既就係龍蝦味啦，不過都係味粉味。So鍾意檸檬雞味多d。 佢地有細細包既獨立包裝，做手信唔錯!!
係富國島夜市都有好多款手工"魚皮花生"，不過就比較甜，鍾意甜野既朋友行過可以試下，佢有大概十個sales不停隊俾你試食嫁。
２）椰子咖啡
越式咖啡絕對係越南名物，我鍾意飲咖啡，所以每次去旅行都會買d當地咖啡試下。 椰子咖啡個包裝睇落比較時尚，而椰子又係越南既特產，當然要試下啦。
不過唔好睇佢一包咁大條，其實沖得細細杯嫁咋（佢寫60ml），加熱水時唔好咁重手。佢本身味道偏甜，加冰凍飲最爽。
３）麝香貓屎咖啡
呢隻味道比較香濃，係麝香貓食左紅色咖啡櫻桃之後排泄出黎既咖啡豆。雖然包裝比椰子咖啡細，不過又可以沖大杯d ~70ml，真係估你唔到呀～我覺得3合1呢隻幾好；而第一張相呢款ground coffee極澀，難以入口，忍唔住倒左。其實食家Minnie已經提過包咖啡冇乜香味，但Jowy驚其他o個啲唔係貓屎咖啡，呢款成隻貓印o係包裝度 (好膚淺既驗證XD)，所以堅持揀呢款。上網check過貓屎咖啡既越南文但其實啲咖啡冇o個隻字lo，都只係講個咖啡豆品種。
４）松鼠咖啡
呢款其實以前屋企啲越南手信都見過，勝在樣靚，味道冇乜特別。感覺ground coffee用既咖啡會好過即溶咖啡lo。
５）芒果乾
呢到既芒果乾比較厚實，唔會好甜、偏酸，似用少啲糖整，價錢同香港差唔多。 我就唔鍾意 (即刻番香港買呂宋芒果乾)，Minnie就好鍾意。
６）空心薯條
我地勁鍾意食空心薯條，越南呢隻比較淡味，都係香港買到果隻好味ｄ。
７）軟腍腍香蕉乾
我地最鍾意買d地道野，呢隻濕漉漉軟腍腍既香蕉應該算係半乾既狀態，So就唔敢試啦XD 想試搵我一齊試啦～因為佢都未開封...
８）特別包裝既牛奶
呢個包裝勁慳位，超適合露營用呀！所以我地都買左２包，等露營試...可惜而家太熱，等涼ｄ一齊黎露營試啦～
９）河粉
到番ｄ正常大路野，就係越南即食河粉啦～其實佢都幾好味，買番香港可以懷緬下越南既味道。
香港既河粉通常係新鮮軟身咁賣，難存儲，好少買黎露營煮。越式河粉雖然口感唔到，但佢好似米粉咁方便存儲攜帶，露營煮OK。
P.S.最近見到香港大生都有得賣啦~哈哈
撰文: Jowy ︳PixsoulHK 隊員: Jowy & So
一齊黎睇靚景﹑影靚相﹑體驗當地人既生活啦~
更多文章..