其實佢係富國島旅游貿易世博會（ thương mại du lịch năm hội chợ triển lã），今年係５月第２個星期舉行。由於富國島既夜間活動唔多，所以呢個開放到夜晚既活動都相當多本地人參加。
世博會場外有小食檔，都頗多本地人買，有煎魚丸﹑春卷﹑魚蛋﹑腸仔﹑鵪鶉蛋（富國島咩小食都會出現鵪鶉蛋，睇黎深受當地人歡迎）﹑豆角等。我覺得味道一般，同埋幾油膩～
食完一輪，有氣力，我地買票入場啦～Vé Tham Quan Hội Chổ 即係入場票既意思；每人VND20,000，即係大概HK$7。
我覺得富國島世博會同香港既工展會差唔多，賣日常用品﹑家品﹑服飾﹑食品。
富國島世博會都有個大型舞台俾歌手唱歌助興，台下有枱櫈提供，大家可以買d小食，一邊聽，一邊享受（至於好唔好聽就見仁見智啦）。
入面既小食種類更多，同夜市相近，樣子精美，不過味道平平。
富國島世博會仲有個小型兒童遊樂場，好適合一家大細來玩；仲有鬼屋，可以滿足鍾意刺激探險既Jowy。
另一邊仲有攤位遊戲同魚蝦蟹（睇下幾多男人玩）。
由於場面既飲品比較多冰，唔抵，所以小編都係去場外買野飲。富國島世博會對面就有果汁檔，當地人大多買沙冰。小攤檔會用水果新鮮即榨，加入煉奶、冰、糖，啱曬鍾意甜既朋友。我地今次試左木瓜、士多啤梨、榴槤同刺果番荔枝。木瓜味都幾清新；而士多啤梨則比較甜。榴槤沙冰就唔係好重味，連唔食榴槤既Sofia都接受得到。刺果番荔枝係香港未見過，味道好似番鬼荔枝，都幾好飲。
隔離仲有生果檔，早知係呢到買生果啦～Sofia係夜市果汁檔買左一個刺果番荔枝番香港，不過呀媽話唔太新鮮T.T
撰文: So ︳PixsoulHK 隊員: Jowy & So
更多文章..